Agosto, mes del folclore paraguayo.

Jasypoapy, tavarandu rehegua jasy.

Ko jasypoapy ningo ijypy guive hu'â meve oguereko arangue imomorambýva, omomba'e guasúva umi ñande marani, ñande jepokuaa ha ñande reko tee rehegua.

Oñepyrû ára 1-gui, karrrulin ñemboy'uha ára. 
Karrulin ningo ha'ehína mboy'upy ojejapóva oñembojehe'a rupi káña, ruda ha limô ojuehe; kóva katuete oñemboy'u pe jasypoapy oñepurûvo omopotî hagua tuguy ha oñemombia hagua mba'asy chu'ikuéra.
Upéi jagureko avei upe ára temitÿ rehegua ha'éva 10 jasypoapy, San Lorenzo ára. Péva ha'ehína ¨postura¨, ára oñeñotÿha avati ani ojuka helada ha hi'a porâ hagua.
Ára 14 jasypoapy, ha'e ñande Poyvi paraguaygua ára. Upe poyvi isa'y mbohapýva pytâ, morotî ha hovýva omondéva ñane retâ, ñane mopeteî ha ñandeikuaaukáva arapy rehe ára.
Upéi ou 15 jasypoapy, ñande tavusu Paraguay (Asunción) ára heñóihague. Péva ningo 15 jasypoapy ary 1537-me capitán Juan de Zalazar y Espinoza rupive oñemyeñói ypyva'ekue.
Hapykuéri jaguereko Mitânguéra ára (Día del niño), 16 jasypoapy, ojegueromandu'a ha oñemomba'e guasúvo umi mitâmimi ome'êva'ekue hekove ñane retâ rayhupápe amo Acosta Ñume, ary 1869-pe.
Ára 22 jasypoapy, ha'e tavarandu ára ñemomora. Hetaite mba'e ningo oî pe ñande tavarandu paraguaygua apytépe. Umíva apytépe imbaretevéva ha'e pe ñane ñe'ê, purahéi, ñemonde, hi'upy, gueroviaapy, temiporâ ha mba'e.
Ára 25 jasypoapy, ha'e Guarani ñe'ê ára. Pe ñe'ê eirete re'ê mbochyete ñane mboheko ha'eñóva ambuekuéra renondépe.
Ha oñemomba'e guasúvo José Asunción Flores rembiapokue, pupoty Guaranía; oñemomorâ upe pupoty ára 27 jasypoapy javerô, kóva ko arange ha'égui José Asunción ára reñói avei. Guaranía ningo ha'e pe género musical omoheñóiva'ekue J.A.F amoite ary 1925 rupi, ha oñemonei 1950 rupi. Omyasâi ha omombarete añetéva'ekue Flores ndive ha'ehína Manu (Manuel Ortíz Guerrero).
Ha oñemboapu'ávo jasypoapy oñemomba'e guasu Santa Rosa ára 30 javérô, kóva jeko yvytu atâ rerekua; ha hu'âitépe San Ramón, kuñanguéra hyeguasúva jeroviaha membyporârâ. Oñemoirûva hese ndaje katuete osê pya'e ha tesâime tagêgui.
Kóicha ningo ko Jasy ¨Agosto¨ombyaty ijehe hetaite mba'e ñande reko rehegua. Péina kóicha mbykymi ambohasa peême, ñamyasâi hagua ñande reko.